Маңғыстауда соттар мен адвокаттар алқасы арасында өзара ынтамақтастық жөнінде Меморандумға қол қойылды

 Маңғыстау  облыстық  соты мен Маңғыстау облысының адвокаттар алқасы арасында өзара ынтамақтастық жөніндегі Меморандумға қол қою рәсімі өтті.

Іс-шараға сот төрағасы Ж.Аланов, аудандық және оған теңестірілген соттардың төрағалары мен судьялары,  Маңғыстау облысы адвокаттар алқасының төрағасы Б.Якушев және адвокаттар, кәсіби медиаторлар,  кеңсе қызметкерлері, БАҚ өкілдері  қатысты.

Ж.Аланов рәсімді аша келе,  «Меморандумға қол қою азаматтық, қылмыстық және әкімшілік сот өндірісінің қағидаларын сақтау, адам мен азаматтың құқықтарын, бостандықтарын және заңды мүдделерін қорғау, дауларды (жан-жалдарды) сот алды және соттан тыс реттеу институттарын жан-жақты дамыту және белсенді енгізу бойынша өзара қимылдарды нығайту, сот ісін жүргізуінің жариялылығы мен ашықтығын қамтамасыз ету, сыбайлас жемқорлықтың алдын алу мәселелеріндегі ынтымақтастық болып табылады», - деді.

Сондай-ақ,  сот төрағасы аталған құжат, партисипативті процедура тәртібінде даулардың реттелу басымдылығын насихаттауда және дауларды шешу кезінде оның қолдану саласын кеңейтуде, даулардың сотқа дейінгі және соттан тыс шешілуін реттейтін институттарды енгізуді, бұқаралық ақпарат құралдарында, соның ішінде Интернет желісі арқылы дауларды (жан-жалдарды) сот алды және соттан тыс реттеудің мүмкіндіктері мен басымдылықтарын, оның ішінде медиациядық процедураларды қолданумен бірлесе құқықты түсіндіру жұмыстарын жүргізуді  нығайтатындығын тілге тиек етті.

Меморандумға қол қою арқылы тығыз байланыста жұмыс жасауға дайындықтарын білдірген тараптар олардың алға қойған мақсаты мен міндеттерін жүзеге асыруда бір-біріне табысты  еңбек тіледі.